2
0
- ਪਿੰਡ ਤੇ ਪਰਦੇਸ *
-ਨਿਊਜ਼ੀਲੈਂਡ ਵਿੱਚ ਅੱਖੀਂ ਦੇਖੀ ਹਕੀਕਤ
ਖੁਰਦਪੁਰ ਛੱਡਿਆ ਸੀ ਮਜ਼ਬੂਰੀ ਨਾਲ,
ਵਿਦੇਸ਼ਾਂ ਵਿੱਚ ਛਾਲੇ ਪੈ ਗਏ ਮਜ਼ਦੂਰੀ ਨਾਲ l
ਮੁਲਕ ਆਪਣੇ ਕੰਮ ਬਥੇਰਾ ਭਾਵੇਂ ਕੀਤਾ,
ਵਾਹ ਪੈ ਗਿਆ ਦੇਸ਼ ਬੇਗ਼ਾਨੇ ਗ਼ੈਰਾਂ ਨਾਲ l
ਯਾਰ ਲੰਗੋਟੀਏ ਰਹਿ ਗਏ ਕਈ ਪਿੱਛੇ,
ਨਾਲ ਜੋ ਆਏ ਭਰ ਗਏ ਮਗਰੂਰੀ ਨਾਲ l
ਮਾਂ, ਪਿਓ, ਭਰਾ ਜੋ ਛੱਡ ਆਇਆ ਪਿੱਛੇ,
ਤੁਰ ਗਏ ਉਡੀਕਦੇ, ਕਰਦੇ ਰਹੇ ਪੁੱਤ ਦੀ ਭਾਲ l
ਆਖੇ ਕੋਈ ਇਥੇ ਮੈਂ ਮੁੰਡਾ ਲੰਬੜਾਂ ਦਾ,
ਜੋੜਦੇ ਫਿਰਦੇ ਰਿਸ਼ਤੇ ਕਈ ਸਰਪੰਚੀ ਨਾਲ l
ਵੱਡੇ ਵੱਡੇ ਪਿੰਡਾਂ ਦੇ ਜਿੰਮੀਂਦਾਰ ਜੋ ਆਏ,
ਫਸਾਉਂਦੇ ਸਿਰ ਕੀਵੀ ਦੀਆਂ ਟਾਹਣੀਆਂ ਨਾਲ l
ਮਾਸਟਰ, ਡਾਕਟਰ ਤੇ ਇੰਜੀਨੀਅਰ ਆਏ,
ਚੁੱਕੀ ਫਿਰਦੇ ਭਾਰ ਡਿਗਰੀਆਂ ਦੇ ਨਾਲ l
ਗਧਾ ਤੇ ਘੋੜਾ ਹੈ ਇਥੇ ਇੱਕ ਬਰਾਬਰ,
ਪੜ੍ਹੇ ਤੇ ਅਨਪੜ੍ਹ ਭਰਦੇ ਬਿਨ ਕੀਵੀ ਦੇ ਨਾਲ l
ਦਿਨ’ਚ ਰੇਨ ਕੋਟ ਕਈ ਵਾਰੀ ਪਾਉਂਦੇ ਲਾਹੁੰਦੇ,
ਥਕਾਵਟਾਂ ਲਾਹੁੰਦੇ ਦੋ ਦੋ ਪੈਨਾਡੋਲਾਂ ਨਾਲ l
ਪੰਜਾਬ ਵਿੱਚ ਪੈਂਟਾਂ ਕਮੀਜ਼ਾਂ ਇਹ ਪਾਉਂਦੇ,
ਲਗਾਉਂਦੇ ਸਨ ਹਰ ਵੇਲੇ ਟਾਈਆਂ ਨਾਲ l
ਕਟਰ, ਆਰੀ, ਗਮਬੂਟ ਬਣੇ ਗਹਿਣੇ ਹੁਣ,
ਗਰਮ ਜੁਰਾਬਾਂ ਹਰ ਪਾਸੇ ਜਾਂਦੀਆਂ ਨਾਲ l
ਸਾਰਾ ਦਿਨ ਗੋਰਿਆਂ ਦੀ ਗੁਲਾਮੀ ਕਰਦੇ,
ਪਿੰਡ ਧੱਕਾ ਕਰਦੇ ਸੀ ਜਿਹੜੇ ਮਜ਼ਬੂਰਾਂ ਨਾਲ l
ਕੁੱਝ ਟੈਕਸੀਆਂ ਚਲਾਉਂਦੇ ਜਾਂ ਊਬਰਾਂ ਪਾਉਂਦੇ,
ਕਰਦੇ ਰਹਿਣ ਹਰ ਵੇਲੇ ਸਵਾਰੀ ਦੀ ਭਾਲ l
ਬੱਸਾਂ, ਟਰੱਕਾਂ ਦੇ ਕੁੱਝ ਡਰਾਈਵਰ ਬਣ ਗਏ,
ਵਧਾਉੰਦੇ ਭਾਰ ਆਪਣਾ ਚੜ੍ਹਦੇ ਸਾਲੋ ਸਾਲ l
ਘਰਾਂ ਦੇ ਕਿਰਾਏ ਤੇ ਕਦੇ ਕਿਸ਼ਤਾਂ ਵਧੀਆਂ,
ਟੈਨਸ਼ਨ ਲਾਹੁਣ ਫਿਰ ਮਾੜੀ ਦਾਰੂ ਨਾਲ l
ਡੇਅਰੀਆਂ, ਠੇਕਿਆਂ ਦੇ ਜੋ ਮਾਲਕ ਬਣ ਗਏ,
ਸੌਰੀ, ਪਲੀਜ਼, ਥੈਂਕ ਯੂ ਕਰਦੇ ਗਾਹਕਾਂ ਨਾਲ l
ਇੱਕ ਡਾਲਰ ਦੇ ਪੰਜਾਹ ਰੁਪਈਏ ਬਣਦੇ ਭਾਵੇਂ,
ਖੂਹ ਦੀ ਮਿੱਟੀ ਪਰ ਲਗਦੀ ਖੂਹ ਦੇ ਨਾਲ l
ਫੋਟੋਆਂ ਪਾ ਕੇ ਕਦੇ ਮਹਿੰਗੀ ਕਾਰ ਘੁਮਾ ਕੇ,
ਐਵੇਂ ਦਗਾ ਕਮਾਵੇਂ ਪਿੱਛੇ ਬਚੇ ਪੇਂਡੂਆਂ ਨਾਲ l
ਹੁਣ ਤਾਂ ਫਸ ਗਿਆ ਏਂ ਤੂੰ ਵਾਂਗ ਮੱਛੀ ਦੇ,
ਗੋਰਿਆਂ ਸੁੱਟਿਆ ਸੀ ਬਣਾ ਜੋ ਮੱਕੜੀ ਜਾਲ l
ਚੰਗੀ ਚਾਹੁੰਨਾ ਤਾਂ ਅਵਤਾਰ ਵਾਪਸ ਮੁੜ ਜਾ,
ਭਲਾ ਕਮਾਉਣਾ ਜੇ ਆਉਂਦੀਆਂ ਨਸਲਾਂ ਨਾਲ l
-ਅਵਤਾਰ ਤਰਕਸ਼ੀਲ ਨਿਊਜ਼ੀਲੈਂਡ
ਜੱਦੀ ਪਿੰਡ ਖੁਰਦਪੁਰ (ਜਲੰਧਰ)
006421392147
